UPADI LEH KHANGTHA KIMAITUANA

Jawaharlal Nehru

(Translated by Dr. David Vumlallian Zou)

[ Tami laigelh Jawaharlal Nehru laibu,The Discovery of India , (laimai LXI ) apat hing kiteikhia ahi.A khangtha zo(modernist) Nehru in a khanglui zo (traditionalist) Gandhi upadite pom hamsa asah khenkhat a om hi.Hinanleh Nehru in Pu Gandhi a tangpi in zana apia a, a kibatlonate uh a gen chiang in zong a pilvang mama hi.

Tami laigelh hing teikhepa David Vumlallian Zou in 1992 kum in St.Paul’s Institute ,Lamka, apat taan X na zo a; St.Anthony’s College ,Shillong, apat ma in B.A.(English hons.) 1998 in na nga a; Jawaharlal Nehru University ,New Delhi, apat in M.A. (History) 2000 kum in zou leuleu a, tu-in M.Phil. a bawl lellel hi.]

1. A mi hiiptheidan, a lamdang leh nial zo gual lo a, a-ngainathuai dante zosia toh, Pu Gandhi khu bangzata a mi lamdang ahi tai! A laigelte leh a thugente in zong ama mihina kiseel khu a talang zou sih a; ama tuamite khel lam ah a om nalai hi. India adia a nasepte en talei, bang zata a thupi a tai le! Hangsanna khu gamtathoi siamna di’a a suutzung ahi; hangsanna tel lo in omdanhoi, sakhua leh iitna chite omthei lo himhim ahi lam a gen hi. “Zauthawngna sal a mihing khat a taan lai sia, thudi ahiloleh itna lampi a zui thei sih ding hi” achi hi…

2. Amapa khu India mel-le-puam tahlatna thupitah a hing suah ta ; i gam tulpankai leh bawlsiat a om hagau kilahna mama khu ama ahi mai hi. India i chi zong amapa ma hiphiala, a hatlo-basapnate zong India basapna ma ahi veve hi. Ama musit a a-om chiang in mimal khat simmona hinon lo a, nampi mualphouna ahi pha ta hi. Musitte touna a toukha thei zel Pu Viceroy leh gualte’n tam bang a a-om chiang ua, haichi zauhuai tu ahilam uh a theisiam nai sih uhi…

3. Gandhi thupina leh India adia a silbawlte, ahiloleh keima’n leiba ama tung a mimal a ka batte nialgual lo in adih na hi.Himananleh sil tampi ah ama zong a dizolona omthei veve kha ding hi.Gen ta mo lei, ama siltup pentah khu bang ahiai? Ama toh kum nempi ka na kithua khawm vang un, a siltupte keima ngel in zong ka thei chian nai sih hi. Ama`n zong a theichet ding ka ginglel hi. Kei adi`n kal khat mai suan hun phot hi, achi a, tua chin mailam hun ding a maleep ut sih hi. I lampi ding thei pou lei , i tunna ding mun buaipi ngai sih , achi veu hi.Tami pen science-peizia leh politiksi toh kikal vawt ngaidan mai hilo in, nundanhoi(ethics) thu toh kitua zong hi be lo hikhathei ding hi. Tami in gamtat-kilawm maimai kochitah in buaipi a, i lungsim khat ah hichi bang dotna a piangsah hi : Koi hoina leh phattuamna ding e i tup pen uh? Mimal thu mai e i gen uh, ahiloleh tangpi hoi zo nang? Pu Gandhi in gamtathoi ngen a uang geen a, huahbu lam a khanletna leh teina lam a nelsia leng hi. Gantathoi tel lo huahbu-teina pen sil zauhuai hinanleh, huahbu-pilna tel lo gamtathoina guah bang ahi thei tuan diai? …

4. Nasep khat a lochin theina di`n tupna kichian ngai hi. Hinkhua pen angka bang a hisaap detdet theilo hi a, tu`a i tupnate ngel zong hun hing kihei tou zel toh kituah a heilamdang zel ngai hi. Hinanleh tupna-dawina kichian bang amakhat behnei ding kuul-le-poima gige hi.

5. Gandhi in 1909 kum in hichi`n ana gelh a, ``A peisa kum sawmnga sung a i zilsate manghil sawmna ah India suahtatna thuguh om hi. I meileeng te,telegraphte,zato-innte, ukiilte, daktolte, leh hichibang a dangdangte zosia a beimang ngai phot hi. A khosathei pawl tungnung(upper class) kichite`n kipaubawl deu leh sakhua vai deu a, lounaseem mimawlte hindan atha sin uh ngai ahi; tuami in lungkimna dihtah a hinkhua ua di`a guan zo ding ahi ngal a.”

6. Kei mudan in vang tambang thute sil dihlo, gindan zauhuai, leh sil tangtung thei vawt lo ding ahi uhi. Pu Gandhi in zawnna,genthei thuahna , leh gamdai-misiangte hinkhua a lungguldan leh a tawisan utdan tahlat in a om hi. Ama a di`n khantou-changkanna pen i dei leh tahsapte punsahna ama, ahiloleh hindan nopzo leh sang zo batphahna chite ah a kinga sih hi…

7. Zawnna –ngauna leh gentheinate silhoi bang dan a a-pahtawi khu keima mimal in ka hua hi.Tambang silte a deihuai in ka ngaisun vawt sih a,suhbei ding ka lunggul zo hi. Mi zosia a hon a misiangthou veve suah di`n ka dei tuan sam sih a, mimal khenkhat a ding in pen hoi kha tama nanleh zong. Mawltah a hindan, kiliang-kimna leh kidehtheina chite ka pomsiam a, zong ka ngaisaang hi; ahi`n lah tahsa suhgentheina chi moh peen a pom hamsa hi. Kimawlmi in tahsa kisoizoina a poima bang in, lungsim leh ngaisutna-peiziate`n zong kisuhzoina leh kidehtheinate a kisam tah zet hi.Gamtat toh kisai a dinmun hoi a i omtheina di`n zong tahsa lam ma bang in, kisuhzoina kuul-leh-poimo veve hi. Hinanleh tuami in gamdai-misiangte bang a omding china amah, ahiloleh mihing tahsa gawt bawl ding chii-na hi kia zel lou ahi.

8. ``Lounaseem mimawlte hindan” Gandhi in a tawisanna thu ah, a deihuai bangma ka mu sih. Tua bang hinkhua a mi puiluut ding lemalah in, louhoumite mama zong huchibang hinkhua apat puikhiat ka nuam hi, a hinkhua uh hasiathuai a ka thei ziah in. Amaute khopi hinkhua a sawnlut dingchi ka hi sih, khopi a hamphatna omte khotate a zong batphah ahithei ding dei ka hi zaw hi. Mimawl hindan ah ka hagau in nopna himhim a nei sih, kei di`n saltanna nou khat a bang zo. ‘Tukawl chiang tawi mi’ ah bang kilawmna a om mawng e? Simseng lo a khang-a khang a netguai leh nuainet a a-om ziah un, a kipawlpi gantate ngel toh zong a kikhiatna uh a om sih phial hi.

“Misi luang bang a nopna leh dana nei lo,

Luanhi nul thei lo, lametna zong nei sam lo,

Hinna bei singluang bang, bawngtal bang di’a ama koi

siam e?”