The Journey of the Magi

(Suahlam mipilte Khualzinna)

- T.S. Eliot

(Translated by Dr. David Vumlallian Zou)

Tuami kum a di’a khovot pen hun, phalbi vuasan nuai ah

Lamsau zawt di’n pheiphung ka suan uhi.

Khovot in ahing tawp a …

Khodam seng in kha kisat vawt hi.

Sangawngsau-te kengna gawp in kidin phin ua,

Vua neel tung ah sambang zal uh.

Khatvei teng lungsi kawm in,

Ka nuasia uh doupi inn nop mualdung a kilamte leh

Puan sanaal a kivon sherbet-zu hawm ngahnute ka gel doh uh.

Sangawngsau pute’n zong numei, zu leh sate hengla in

Tongsie hing law khun ua, lungton in ahing heisan uhi.

Zanlai meivahte mit in, lungah nang sawlbuh um lou a,

Khopi sung a hei mite’n ngaidan dang in hing gal et uh.

Khotate lah polte in, nehsiat leh du-amna toh kidim.

Lamba leh husam in ka mau uhi.

Atawp ah, sun leh zan khol lou in pheiphung ka suan a,

Ah-imu bang in tom nounou ka imu zel uhi.

Ka bilha ua huikhi hing lang hiauhiau te’n zong,

“Mot vai vawt e!” hing chi uh.

Taikhua vah in vuah kiah lou na, sing-le-lou hinna,

Phaizang khohun nopzawna gam tuangtung ta ung,

Luita luang lai ah ansukhol khat a ging dupdup a,

Lenkawl ngoumei niam nou in singkung thumte a bawm.

Lou lai ah sakol teh kaang khat a kikho mang a,

Tuachi’n tawlet a lengga gui zamna giahbu khat ka tung uhi.

Mi guh ludaw kikap ua, keng khat in zuthawl homte a peh hi.

Nanleh thuchian bangma kitheibe lou a,

Mailam ka nawt zel uhi. Ziat leh vei ah lamhai in pial maleh ung

Khomui in tuang ka tung uh; kipah man in ka biangki uah luanhi luang.

Tam te nunlui thu ahi ta, lunghel sah in.

Ka khualzin kisia vawt sing, nanleh silmah khat hing gen vang:

Pianna maw Shina – bang pen mu ding bep a zinkhia ka hi uai?

Pianna pen kichian tah in um a, lungawp kai na ding bangma a um sih.

Pianna leh Shina ka mu ngai ta a, amau gel sil kibang lou in ka na geel zing hi.

Tami Pianna in ling bang hing dou a, kou din Shina gu a bang hi.

Lenghuang sung a inn nop tah te ah ka kile kia ua,

Nanleh hun leh kumte kikhel ta a, tam mun ah nun nopna himhim um non lou,

A pasiante uh tukip tinten mei theilou hon lai ah

Khatvei shi kia ding ken ka teel zaw hi.